Tara Na’t Mag-INTERCOURSE

34/365 days of blogging.

intercourse4Anoba’t hindi ko nasabi sa inyo na nung birthday ko eh dinala ako ni Bossing sa Pennsylvania? Biglaan na plano – umalis ng Lunes ng gabi ng a-singko, bumalik ng Maryland ng a-sais. At ang pinuntahan namin ni Bossing?

Intercourse.

Sa Pennsylvania.

Ang galing ng pangalan diba? Isa syang Amish county sa Pennsylvania.  Mga isang oras at kalahati lang na walang ka-strees-stress na byahe magmula dito sa bahay namin.  Amish.  Yung mga taong, dahil sa relihiyon nila, hindi gumagamit ng kahit na anong modernong mga kasangkapan at bagay.  Mga naka-karitela kapag nag-ba-byahe, gumagamit ng mga kabayo para sa pag-bungkal ng lupa, walang pridyider or washing machine at dryer sa bahay, hindi gumagamit ng internet, TV, cellphone at kung anik-anik pang gawa ng modernong teknolohiya dahil hindi naman raw kailangan yun sa buhay.  May point… pero mahirap yun, eh.  Mawalan ba ng koryente, ng cellphone?  Ng TV? At higit sa lahat, ng INTERNET????  Mamamatay ako.  Pramis.

intercourse1Ang sarap ng byahe namin kasi ang gaang ng drive – walang traffic.   Nung nasa bukana na kami ng Intercourse, tinuturo na sa akin Bossing yung mga Amish na nakakaritela.  Aliw na aliw ako.  At akala ko nakatira lang sila sa mga maliliit na mga bahay kasi, wala lang.  Akala ko lang kasi.  Pero hellers, ang mga bahay, sobrang lalaki kaya?  Hindi sya magarbo, hindi sya mukhang palasyo, pero malalaki.  Madalas nasa gitna ng malawak na mga bukid na ang sabi sa akin ni Bossing, pag-aari din nila.  So hellers, hindi tutuong Purita Kalaw sila.  Hindi lang talaga nila feel ang technology.   At diba nasabi ko na sa inyo na wala silang mga washer at dryer, hellers, kamustahin mo, ang haba ng mga sampayan.   Pero ang isa pang mapapansin ninyo, walang mga matitingkad na kulay ng damit sa sampayan.  At hindi uso ang mga backless, mga tirante, mga gown.  Isang style lang ang mga damit nila.  Plain, walang print, kulay blue, itim, puti at brown.  Hindi nila alam ang spelling ng neon orange, fuschia pink, at mello yello.  Ganun sila.

intercourse5Nagkataon, nung naghahanap na kami ng hotel na tutulugan, ginabi na kami.  Ang masama, ang tinuturo ni Manang (ang aming GPS navigator) na kung saan kami dadaan, isang mahabang-mahabang kalyeng bato-bato na walang kailaw-ilaw sa paligid.  May manaka-nakang mga bahay pero madilim sa paligid.  (Eh kasi nga diba, hindi sila gumagamit ng electricity)  Mistula bang parang maya-maya, may mga children of the corn na lalabas kung saan at papatayin kami.   Wala lang, OA lang talaga ang imagination ko.  At habang freak out na ako, tawang-tawa lang si Bossing sa akin.  Wala lang.  Trip lang nya.  Ang saya lang, diba?

Pero ok lang.  Keri na rin.  Sa haba-haba ng daan, natunton din namin ang kabihasnan.  May mga ilaw at mga restawran.  Nung makakain na kami, nakakita na rin kami ng hotel.  At yun, the whole night nakatutok ang TV sa isang amish channel na pinapakita nila yung mga spots at pwedeng gawin sa paligid.  Kinabukasan, nag-buggy-trip kami ni Bossing at niligid kami nung buggy sa paligid ng Intercourse.  At ang daan nung gabi na sobrang dilim, ang ganda pala nya sa araw kasi puro mga bukid, mga sinampay, at mga amish na lalaking nagbubungkal ng mga lupa nila gamit ang mga kabayo.  Nakakaaliw talaga.

intercourse3Nung hapon, siempre, naghanap na ako ng outlet mall sa may bandang labas na ng Intercourse. Mistulang very cultural man ang field trip, dapat present pa rin ang outlet, hindi pwedeng wala.  Kasi wala lang… dapat lang meron. hehehehe

Eto ang trip na regalo sa akin ni Bossing. Masaya kami, na-aliw kaming dalawa at bonding to the max kami.  Dagdag na naman namin ito sa marami pa naming magiging mga road trip.  Yun ang sarap ng kasama ni Bossing.  Walang arte, walang maraming plano.  Walang maraming requirements.  Basta pwede, hindi sya mahirap yayain atsaka hindi nauubusan ng idea.  Maarunong syang maghanap ng mga nakakaaliw na mga mapupuntahan na hindi masyadong gagastos.  Eh bagay kami kasi kaladkarin akong babae, hindi ako maarte (altho marunong akong mag-inarte hehehe) at ok sa akin yung hindi magastos na mga trip.

Ang sarap mag-birthday talaga.

Related Posts with Thumbnails

(Nakita 25660 beses ng 4940 bisitors)